車仔麵地上最強 柚皮鴨胸邊度有？

上回說到的平民美食車仔麵之選，以辣汁作主題，今次回歸基本的車仔餸味道和款式。車仔麵演變至今，每間店的餸款都有廿款以上，才稱得上叫做有及格吧。以下4間車仔麵餸都是經過嚴選！

1. 車仔麵之家     咖喱魷魚無得輸

▲ 粉腸沒苦味，飽滿又爽脆。(趙景隆攝)

灣仔的車仔麵之家，以立食著名。幾個月前同區開了分店，終於有得坐，還有冷氣供應。原來舊老闆頂了給朋友做，再擴展業務。

新店無論堂食或外賣，都需要在門口排隊柯打，筆者當然必柯打鎮店3寶：咖喱魷魚、酸齋和豬腸，只是見到有粉腸，便改了。一來粉腸已少店做，就算做也做得難吃。竟然這裏做得很好，沒苦味之餘，亦爽口兼質感飽滿，難得。

至於招牌咖喱魷魚，水準仍然保持到，爽口有嚼勁，卻是食到味道。新老闆沒有將貨就價，用料跟足舊時，以成本貴土魷一倍的阿根廷乾魷來做，因其厚肉，夠大隻，取貨後，以清水浸半日，避免魷魚過度被梳打水浸發，只得一味爽口失卻味道。

▲ 咖喱魷魚每天生炒，入味之餘也爽口。(趙景隆攝)

要知這店的魷魚是用自家製咖喱醬生炒爆的，快炒快兜，在魷魚鬚捲起熟透前，使醬汁平均掛滿魷魚上，這樣魷魚便不會因炒得過火而變韌，真係無得輸！

其他餸料推介：除了大家熟知的酸齋和豬腸外，釀豆卜有驚喜，是整粒豆卜內釀，不是半邊釀，口感很豐富。
每餸價錢：$7-$10

地址：灣仔春園街32-38號榮利大廈地下6號店
電話：2878 7338

2. 麵麵店    特別湯、餸、麵選擇多

▲ 麻辣蓮藕、鯪魚肉、牛膀、牛肺等是坊間車仔麵店少有配料。(曾有為攝)

自從幾年前年DJ小儀入股後，佐敦老字號麵麵店改頭換面，除了佐敦本店外，大角咀亦有分店。

以往的招牌以大地魚、豬骨、蝦殼和雞熬足一晚的清湯底同樣夠鮮甜，當中可揀沙嗲汁、勁辣汁。最特別的是有薑酒湯底，像極女士「坐月」時飲的薑湯，很受「夠薑」女士們歡迎。

數數車仔餸竟多達60款，而且夠特別，如牛肺、牛膀、鯪魚肉、鮮腐皮、魚肉春卷，係咪聽到都想食呢？至於粉麵種類亦有10款之多，其中的烏冬，註明是讚岐，還有越式檬粉選擇，來個乾撈檬粉也不俗。正好這裏亦有乾撈麵口味，細心之處是會替客人撈埋汁，感覺窩心。

▲ 辣菜甫一直是此店的鎮店調味，愛辣者的摯受，經常賣斷市。(曾有為攝)

其他餸料推介：沙葛餃是自製的，餡料夠爽口；麻辣蓮藕的麻辣汁調製出色，香辣有致，有後續力。
每餸價錢：$8-$17

地址：佐敦廟街274號地舖
電話：2375 3300
 
【延伸閱讀】咖喱汁 VS 沙嗲汁 　辣到冒汗的車仔麵辣汁

3. 超級無敵車仔麵        鴨胸罕有

▲ 老闆李生謂店內食材有3分之2是自製的。(馮柏偉攝)

能叫得做超級無敵車仔麵，都真的有幾分招積本事吧！老闆李生謂在多達40多種餸料中，只有約3分1的食材是來貨，其他都是由他自家製，如豬扒，堅持不用梳打粉，用老抽、糖、鹽、蛋汁醃製，出來效果真的鬆軟。

這裏的另一招牌是滷水系列，豬耳、蛋，雞翼、五花腩等不俗，而較少在車仔麵店供應的鴨胸，不妨試試，切得厚身。李生謂是煙熏後再以滷水醃過，難怪如此入味。

▲ 滷水鴨胸滷得入，豬扒都不錯。(馮柏偉攝)

他續謂不要以為滷水餸簡單，只是放些食材入煲內煮就得，事前要做不少工夫，如豬耳要除毛，工序多，另要按各食材的特質、厚薄等，來分配滷水的鹹甜比例、濃度等來滷，否則過鹹或不入味。

近日他還join 了UberEATS及 Food Panda 的外賣服務，筆者下午在店食麵，只見外賣員來拿麵者絡繹不絕，生意超好，估不到李生如此先驅耶！

其他餸料推介：牛腩以柱候醬炆，夠入味；九菜餃和雲吞是李生每天以鮮蝦、豬肉等鮮製，有不少人生料外賣當火鍋配料。

每餸價錢：兩餸麵 23 元，三餸麵 30 元，另加一餸加8元

地址︰西灣河街116 號地下 B 舖
電話︰5300 1388

【延伸閱讀】Eason都食西灣河沙嗲串燒　秘製醬汁猶勝老巴刹串燒

4. 佳佳粉麵店    必食柚皮豬腸豬耳

位於大角咀的佳佳粉麵店，專賣車仔麵，在大角咀已開檔幾十年，初時是推車仔的街頭車仔麵，後來搬到此梗鋪。

店內最馳名的是，其精製柚皮，柚皮是古老菜式，現時連酒樓食肆都極少做，但佳佳每天都花十數小時炆柚皮，做到又林又入味，小小辣，柚皮價錢不貴但功夫多，是功夫菜，難得車仔麵店有得食。

▲ 佳佳三寶：順時針方向，柚皮、豬大腸、豬耳。（攝影：單志民）

筆者到訪當日，便見到兩箱柚皮放在店前生曬。另要必點的，滷水豬大腸及豬耳。阿姐說材料是新鮮豬大腸及豬耳，食味跟雪藏貨完全不同，滷水汁特濃，卻不是死鹹。

記者亦點了佳佳的咖喱魷魚及「新出品」炸雲吞，魷魚入味又肉厚，超正；炸雲吞是舊式一塊那種，而非捲成雲吞狀，這其實是懷舊小食，以往在街邊檔有售，現在反而少見。

店中接近40種餸，麵食選擇亦有9種，刀削麵都有，各種餸由6元至16元不等。這裏不設點餸紙，全部在阿姐面前揀，相當傳統。

▲ 特製滷水汁豬腸，老闆阿姐說是新鮮豬大腸。（攝影：單志民）

地址：旺角福全街14號地下
交通：港鐵旺角站 A2 出口, 步行約8分鐘

【其他熱話】恍似置身異國的4個香港呃 like 景點

【其他熱話】一個高爾夫球KO筋膜炎「痛腳」

【其他熱話】遊日窮L開餐必食     日本松屋18元牛肉飯  

【其他熱話】80後女生移民台灣開Cafe    移民手續逐格睇